Fransiyalik vazir: Buyuk Britaniya Kaledagi voyaga yetmagan muhojirlarni qabul qilishi shart!
Buyuk Britaniya hukumati Fransiyaning Kale shahridagi qochoqlar lagerida qolayotgan va Birlashgan Qirollikda qarindoshlari bo‘lgan voyaga yetmagan muhojirlarni imkon qadar tezroq qabul qilishi shart. “TASS”ning xabar berishicha, bu haqda Fransiya turar-joy siyosati vaziri Emmanyuel Koss aytib o‘tgan.
“Britaniya hukumati xalqaro huquq me’yorlariga rioya etishni boshlashi uchun Fransiya ichki ishlar vaziri Bernar Kaznyov Angliyaga bir necha bor safar qilib, The Guardian’ga intervyu berishga majbur bo‘layotganiga toqat qilib bo‘lmaydi”, — dedi vazir.
So‘nggi ma’lumotlarga ko‘ra, Kaledagi qochoqlar lageri hududida taxminan 1,3 mingga yaqin voyaga yetmagan muhojir bor, ulardan 500 nafari Buyuk Britaniyada qarindoshi borligini ma’lum qilgan.
Kaleda faoliyat olib borayotgan nodavlat tashkilotlar xodimlari taqdim etgan axborotga ko‘ra, so‘nggi bir hafta ichida voyaga yetmagan muhojirlarning 200 nafari Buyuk Britaniyaga kirish uchun ruxsat olgan.
“Oilasi bilan birlashish huquqiga ega barcha voyaga yetmagan shaxslar zudlik bilan Britaniya hududiga o‘tkazilishini istaymiz. Bir necha yuz kishi eng qisqa muddat ichida u yerga kiritilishi kerak”, — dedi Koss.
Kale chekkasida joylashgan qochoqlar lagerida, turli hisob-kitoblarga ko‘ra, 6—10 ming nafar muhojir bor. Ularning aksariyati Sudan, Afg‘oniston va Eritreya fuqarolaridir. 24-oktabr kuni Fransiya hukumati lagerdagi muhojirlarni ko‘chirishni boshladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
