O‘zbekiston “Milliy tiklanish” demokratik partiyasi vakillari 21-oktabr, juma kuni Markaziy saylov komissiyasiga partiyadan O‘zbekiston Respublikasiga Prezidentligiga nomzod hujjatlarini taqdim etdi. Tadbirda komissiya a’zolari, siyosiy partiyalar hamda OAV vakillari ishtirok etdi. Bu haqda “Daryo”ga O‘zbekiston Respublikasiga Prezidenti saylovini yoritish bo‘yicha Respublika matbuot markazi ma’lum qildi.
Markaziy saylov komissiyasi taqdim etilgan hujjatlarni bir hafta mobaynida tekshirib chiqadi va ularning qonunga muvofiqligi tug‘risida xulosa beradi.
Hozirda Markaziy saylov komissiyasida imzo varaqalari to‘g‘ri to‘ldirilganligini tekshirish bo‘yicha ekspertlar guruhi tashkil etilgan bo‘lib, uning tarkibiga komissiya a’zolari, jamoat tashkilotlarining vakillari, ichki ishlar, adliya idoralari mutaxassislari kiritilgan.
Eslatib o‘tamiz, “Milliy tiklanish” demokratik partiyasining Toshkentda 15-oktabr kuni bo‘lib o‘tgan syezdida partiya markaziy kengashi raisi, Oliy Majlis Qonunchilik palatasidagi partiya fraksiyasi rahbari Sarvar Otamuratov O‘zbekiston Prezidentligiga nomzod etib ko‘rsatilgandi.
Izoh (0)