Janubiy Koreyaning “Chonbuk Motors” klubi o‘z tarixida uchinchi bor Chempionlar Ligasi finaliga yo‘l oldi

Osiyo Chempionlar Ligasining 2016-yilgi mavsumi finalida BAAning “Al-Ayn” va Janubiy Koreyaning “Chonbuk Motors” klublari to‘p suradi.

18-oktabr kuni “Al-Ayn” o‘zbekistonlik futbolchi Sardor Rashidov harakat qiladigan “Al-Jaish” bilan durang o‘ynab, ikki o‘yin natijasiga ko‘ra final chiptasini hal qilgandi. 19-oktabr kuni esa “Chonbuk Motors” Janubiy Koreyaning boshqa bir klubi “Seul”ni turnirdan chiqarib yubordi.

Tomonlarning birinchi o‘yinida “Chonbuk Motors” 4:1 hisobida zafar quchgandi. Javob o‘yinida esa “Seul” g‘alaba qozondi — 2:1 va Chempionlar Ligasi bilan xayrlashdi.

Osiyo Chempionlar Ligasi reglamentiga ko‘ra, final ikki o‘yindan iborat bo‘ladi. 19-noyabr kuni “Al-Ayn” Janubiy Koreyada mehmon bo‘lsa, 26-noyabr kuni tomonlar Amirliklarda kuch sinashadi.

Ma’lumot uchun, musobaqa yangi formatga o‘tgan 2003-yildan buyon “Chonbuk Motors” finalda ikki bor to‘p surgan bo‘lib, 2006-yil bosh sovringa ega chiqqan. 2011-yilgi finalda esa imkoniyatni boy bergan.

“Al-Ayn” klubida ham vaziyat xuddi shunday. Amirlik klubi 2003-yilgi mavsumda chempionlikni tantana qilgan, 2005-yil finalda mag‘lub bo‘lgan.

Osiyo Chempionlar Ligasi Yarim final 19-oktabr, chorshanba

“Seul” (J. Koreya) — “Chonbuk Motors” (J. Koreya) 2:1