Oliy Majlis Qonunchilik palatasining Axborot va kommunikatsiya texnologiyalari masalalari qo‘mitasi tashabbusi bilan “Tadbirkorlik subyektlariga elektron davlat xizmatlari ko‘rsatishning tartib-tamoyillari va huquqiy asoslarini takomillashtirish” mavzuida seminar tashkil etildi. Bu haqda O‘zA xabar bermoqda.
Parlament quyi palatasining Axborot va kommunikatsiya texnologiyalari masalalari qo‘mitasi raisi o‘rinbosari E. Xolbo‘tayev, axborot texnologiyalari va kommunikatsiyalarini rivojlantirish vazirining birinchi o‘rinbosari A. Fayzullayev, adliya vazirining o‘rinbosari A. Usmonov va boshqalar tadbirda ishtirok etdi.
Seminarda tadbirkorlik subyektlariga “yagona darcha” tamoyili bo‘yicha davlat xizmatlari ko‘rsatish yagona markazlarining samarali faoliyati, ularning tadbirkorlik subyektlarini ro‘yxatga olish, litsenziyalash va boshqa ruxsat beruvchi tartib-tamoyillar muhokama qilindi.
“2016-yil 1-yanvardan boshlab mamlakatimizning barcha hududlarida tadbirkorlik subyektlariga ‘yagona darcha’ tamoyili asosida davlat xizmatlari ko‘rsatish boshlangan, — dedi Qonunchilik palatasi deputati Rasul Kusherboyev. — Mazkur markazlarda tadbirkorlik subyektlarini ro‘yxatga olish va hisobga qo‘yishni avtomatlashtirilgan tizim orqali 24 soat uzluksiz amalga oshirish tartibi joriy etildi. 2016 yil 1-oktabr holatiga ko‘ra markazlarda 76 mingdan ziyod davlat xizmati ko‘rsatildi. Markazlar tomonidan keng ko‘lamli axborot xizmatlari yo‘lga qo‘yilib, hozirga qadar tadbirkorlik subyektlariga yuz mingdan ziyod bepul maslahat berildi”.
Seminarda “yagona darcha” markazlari faoliyatiga oid veb-sayt yaratish, markazlar xodimlarining tizimli ravishda malakasini oshirish, ularning faoliyat samaradorligini kuchaytirish bilan bog‘liq masalalar muhokama qilindi.
Izoh (0)