Xonanda Shohjahon Jo‘rayev 20—22-oktabr kunlari “Istiqlol” san’at saroyida jonli ijroda “Kim edigu, kim bo‘ldik” deb nomlangan konsert dasturini taqdim etadi. Jurnalist Feruz Muhammad konsertoldi tayyorgarlik jarayonida mehmon bo‘ldi.
Xonanda “Istiqlol”da 2013-yil taqdim qilgan “Shukrona”, 2014-yilgi “Dunyoning jannati” nomli konsert dasturlaridagi an’anasiga sodiq holda, yangi konsertni ham to‘liq jonli ijroda o‘tkazadi.
Yangi konsert dasturida Shohjahon Jo‘rayev 20 dan ortiq qo‘shiq kuylashni niyat qilgan. Kuylanishi rejalashtirilayotgan taronalarning qariyb yarmi muxlislar uchun yangilik bo‘lishi kutilmoqda.
Ma’lum qilishlaricha, konsertda yangraydigan aksariyat yangi qo‘shiqlarning so‘zlari Abdulla Oripov, Zohidjon Olov, O‘tkir Xidirov kabi zamondosh shoirlar, Ogahiy, Hofiz Xorazmiy kabi mumtoz she’riyat vakillarining qalamiga mansub.
Konsertga tayyorgarlikning jurnalist Feruz Muhammad mehmon bo‘lgan kuni Shohjahon Jo‘rayev “Gulim”, “Unutmadim unutganing”, “Lolaqizg‘aldoq”, “Ey, ona”, “Nedir ul”, “U kunlar boshqa edi” kabi yangi qo‘shiqlari ustida ish olib borayotgan edi.
Xonanda ma’muri Shuhrat Usmonovning alohida takidlashicha, uch kunlik konsertda asosiy e’tibor sahna bezaklari, raqqosalar guruhi, qiziqchi va boshlovchilarning chiqishlariga emas, balki faqat va faqat jonli ijrodagi kuy va qo‘shiqlarga qaratiladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)