AQShda bir yoshli Siam egizaklari muvaffaqiyatli ajratildi

Nyu-Yorkda jarrohlar boshlari qo‘shilib ketgan 13 oylik Siam egizaklarini ajratish bo‘yicha operatsiya o‘tkazdi, deb yozadi “Korrespondent.net”.

Operatsiyaning o‘ziga shifokorlar jamoasi 16 soat vaqt sarfladi, egizaklarning endigina ajratilgan bosh suyaklarini rekonstruksiya qilishga esa yana bir necha soat talab etildi.

Ayni paytda bolalardan biriga uyga ketish uchun ruxsat berildi, ikkinchisi esa shifokorlar nazorati ostida bo‘lib turibdi, mutaxassislar aytishicha, u ham tez orada uyga qaytishi mumkin bo‘ladi.

Operatsiyadan so‘ng bolalarning onasi Nikol Facebook‘da o‘z taassurotlari bilan bo‘lishdi. “Men bir vaqtning o‘zida ham quvonchni, ham noaniqlik qo‘rquvini his etmoqdaman”, — deb yozdi u.

Bundan tashqari, ayol farzandlari bir necha oy davomida og‘ir reabilitatsiya jarayonidan o‘tishi kerakligini, biroq u operatsiya muvaffaqiyatli kechganidan xursandligini qo‘shib qo‘ydi.