YuNESKOning Masjid al-Aqso bo‘yicha oxirgi rezolyutsiyasiga munosabat bildirayotgan isroillik siyosatchilar diplomatiyani unutib, tashkilotni keskin tanqid ostiga olmoqda va turli yo‘llar bilan qarorga qarshiligini bildirmoqda. Mamlakat ta’lim vaziri, YuNESKO ishlari bo‘yicha Isroil milliy komissiyasi rahbari Naftali Bennet rezolyutsiyani “sharmandali” deb baholagan edi. Endilikda mamlakat bosh vaziri Binyamin Netanyaxu qarorga munosabatini bildirdi, deb xabar beradi “RBK”.
“Xo‘sh, keyinchi? YuNESKO qarori yer yong‘oq moyi va jele o‘rtasidagi aloqani inkor qiladimi? Betmen va Robin o‘rtasidagi aloqani? Rok va Roll o‘rtasidagi aloqani?”, — deb yozdi hukumat rahbari Twitter’dagi sahifasida.
Ibodatxona tog‘i — Quddus hududida joylashgan maydon bo‘lib, u yahudiylar uchun birinchi darajali, musulmonlar uchun uchinchi darajali muqaddas qadamjo hisoblanadi. Ushbu maydonda qadimda Birinchi va Ikkinchi Quddus ibodatxonasi mavjud bo‘lgan, bugun esa u yerda al-Aqso masjidi joylashgan.
13-oktabr kuni YuNESKO Misr va Falastin tomonidan taklif etilgan rezolyutsiyani qabul qildi. Unda Quddusdagi yodgorlik maydoni islom dini bilan bog‘liqligi ta’kidlanadi, yahudiy xalqining qadamjoga aloqadorligi haqida esa hech narsa deyilmaydi. Hujjat Isroilni Quddusda musulmonlar haq-huquqlarini buzayotgani uchun qoralaydi, shuningdek, bundan buyon “Ibodatxona tog‘i” atamasi o‘rniga qadamjo “Masjid al-Aqso” deb atalishini ko‘zda tutadi.
Rezolyutsiyani 58 mamlakatdan 24 tasi ma’qulladi, bular orasida Rossiya, Xitoy, Jazoir, Bangladesh, Marokash, Ummon, Livan, Qatar, Eron, Meksika bor. Isroilni AQSh, Buyuk Britaniya, Litva, Niderlandiya, Estoniya va Germaniya qo‘llab-quvvatladi, qolgan 26 mamlakat ovoz berishdan tiyildi.
Izoh (0)