O‘zbekiston milliy terma jamoasi hujumchisi Eldor Shomurodovning ProSports Management kompaniyasi bilan shartnoma tuzgani haqida “Championat.asia” nashri xabardor qildi.
Kompaniya vakili Nikita Panasyuk “Bunyodkor” klubi a’zosi haqida shunday fikrlar bildirdi:
“Universal hujumkor futbolchi bo‘lgan Shomurodov 21 yoshda. U qanotda ham, markaziy hujumda ham, hujum ortida ham o‘ynay oladi. O‘yin uslubi va qobiliyati jihatidan Andrey Yarmolenkoni yodga soladi: tezkor, baquvvat, texnik tomonlama kuchli, maydonni yaxshi ko‘radi va qarshi hujum vaqtida qarorni tez qabul qiladi”.
“Eldor jismonan kuchli bo‘lgani uchun ham ko‘p raqiblari bilan kurasha oladi. 182 santimetr bo‘yga ega va tez chopa oladi. Yugurishda boshlang‘ich tezligi ancha yaxshi. Ikkinchi qavatdagi kurashlarda hamda standart vaziyatlarda juda foydali”.
“Futbolchining driblingi haqida ham to‘xtalish kerak. Bitta o‘yinda raqiblarini o‘rtacha 6 bor aldab o‘tadi. Taqqoslash uchun: ‘Zenit’ a’zosi Julianoda bu ko‘rsatkich o‘rtacha 5 tani, ‘Spartak’dagi Promesda o‘rtacha 8 tani tashkil qiladi”.
Eldor Shomurodov O‘zbekiston milliy terma jamoasi safida 12 ta uchrashuv o‘tkazgan bo‘lib, 4 ta gol urishga muvaffaq bo‘lgan. Qo‘shimchasiga, 1 ta golli uzatmani amalga oshirdi. Jumladan, Marat Bikmayev JCh—2018 saralashi doirasida Xitoy darvozasini ishg‘ol qilish uchun aynan Eldordan pas qabul qilib olgandi.
“Osiyolik futbolchilar yangi muhitga qiyin moslashadi — deb so‘zida davom etdi kompaniya vakili. — Ammo Denisov va Ahmedovning Rossiyadagi faoliyati buning teskarisini ko‘rsatdi. Eldor ruschada yomon gapirmaydi, Yevropaga yo‘l olishni istasa, ingliz tilini o‘rganishi kerak bo‘ladi”.
Shomurodov to‘liq bo‘lmagan ikki mavsumda “Bunyodkor” uchun 19 ta gol urib, 7 ta golli pas oshirgani qayd etilgan. Shuningdek, kuchli jamoadagi kuchli sheriklar bilan uning o‘yini oldinga yana bitta qadam tashlashi tushuntirilgan.
Ma’lumot uchun, Eldor Shomurodov 2015-yilgi mavsum yakunlariga ko‘ra Osiyo qit’asining eng yaxshi futbolchisi bo‘lish uchun tanlab olingan uch nafar futbolchi qatoriga kirgandi.
Izoh (0)