Isroil ta’lim vaziri YuNESKO bosh direktorini mamlakat tashkilot bilan har qanday ko‘rinishdagi hamkorlikni to‘xtatishi haqida ogoh etdi. YuNESKO tarafidan Quddusdagi Ibodatxona tog‘ining yahudiylarga daxldorligini inkor etuvchi rezolyutsiya qabul qilinishi bunga sabab sifatida ko‘rsatildi, deb xabar beradi “RBK”.
Ibodatxona tog‘i — Quddus hududida joylashgan maydon bo‘lib, u yahudiylar uchun birinchi darajali, musulmonlar uchun uchinchi darajali muqaddas qadamjo hisoblanadi. Ushbu maydonda qadimda Birinchi va Ikkinchi Quddus ibodatxonasi mavjud bo‘lgan, bugun esa u yerda al-Aqso masjidi joylashgan.
13-oktabr kuni YuNESKO Misr va Falastin tomonidan taklif etilgan rezolyutsiyani qabul qildi. Unda Quddusdagi yodgorlik maydoni islom dini bilan bog‘liqligi ta’kidlanadi, yahudiy xalqining qadamjoga aloqadorligi haqida esa hech narsa deyilmaydi. Hujjat Isroilni Quddusda musulmonlar haq-huquqlarini buzayotgani uchun qoralaydi, shuningdek, bundan buyon “Ibodatxona tog‘i” atamasi o‘rniga qadamjo “Masjid al-Aqso” deb atalishini ko‘zda tutadi.
Rezolyutsiyani 58 mamlakatdan 24 tasi ma’qulladi, bular orasida Rossiya, Xitoy, Jazoir, Bangladesh, Marokash, Ummon, Livan, Qatar, Eron, Meksika bor. Isroilni AQSh, Buyuk Britaniya, Litva, Niderlandiya, Estoniya va Germaniya qo‘llab-quvvatladi, qolgan 26 mamlakat ovoz berishdan tiyildi.
Isroil ta’lim vaziri, YuNESKO bo‘yicha Isroil milliy komissiyasi prezidenti Naftali Bennet tashkilot bosh direktori Irina Bokovaga yo‘llagan maktubida bu rezolyutsiyani “sharmandali” deb atadi. Maktub matnini vazir Twitter’dagi sahifasida keltirdi.
“YuNESKO a’zolarining tarixni inkor etish hamda yahudiy xalqining Quddus va Ibodatxona tog‘i bilan ming yillik aloqasiga ko‘z yumish haqidagi sharmandali qaroridan so‘ng men YuNESKO ishlari bo‘yicha Isroil milliy komissiyasini xalqaro tashkilot bilan professional hamkorlikning har qanday ko‘rinishlari to‘xtatilganidan ogohlantirdim”, — deb ta’kidladi Bennet.
Bennet tashkilotni tarixni inkor etish va professionallikni yo‘qotishda aybladi.
Izoh (0)