“Roskosmos” va EKA Marsga desantli modul yo‘llaydi
19-oktabr kuni “Roskosmos” hamda Yevropa kosmik agentligi (EKA) hamkorligida uchirilgan “Skiaparelli” desantli moduli Mars yuzasiga yetib boradi. Bu haqda “Hi-Tech.Mail.ru” xabar bermoqda.
“EkzoMars-2016” missiyasining kosmik apparati 2016-yil 14-martda Boyqo‘ng‘ir kosmodromidan uchirilgan edi. 16-oktabr kuni desant moduli TGO (Trace Gas Orbiter) orbital modulidan ajralib, 17-oktabr kuni Mars atmosferasiga kiradi.
Modul sinovdan o‘tkazadigan texnologiyalar kelajakda Marsga yo‘llanajak boshqa missiyalarda qo‘llanadi. Modul bortidagi ilmiy apparatura asosiy ko‘rsatkichlarni yozib oladi: havo harorati, bosim, shamol tezligi, namlik. Bundan tashqari, modul Mars elektr maydonlarini o‘rganadi.
“Skiaparelli” bir necha kun davomida Quyoshga yo‘naltiriladi. Shu yo‘l bilan u qo‘shimcha issiqlik to‘plab, TGO’dan ajralib chiqqanidan so‘ng ham ishchi haroratda bo‘ladi va energiya tejaydi.
O‘z navbatida, orbital modul “Skiaparelli” ajralib chiqqanidan so‘ng Mars orbitasiga o‘tishga urinib ko‘radi. TGO bir qator uzun va murakkab sekinlashish manyovrlarini o‘tkazadi, so‘ng 2017-yildan yangi ilmiy missiyasini boshlaydi. Modul “EkzoMars-2020” missiyasi tarkibiga kiradigan rover signallarini retranslyatsiya qiladi.
Ayni paytda Marsda Curiosity roveri bo‘lib, u Yerga fotosuratlar yo‘llab turadi. Insonlarning Marsga borishi esa hozircha xavfli hisoblanadi. Shunga qaramay, AQSh prezidenti Barak Obama 2030-yillarga kelib Marsga insonlar yo‘llanishi mumkinligini aytdi.
