Eron terma jamoasi 2018-yilgi Jahon chempionatining saralash bosqichi doirasida Tehronda Janubiy Koreya terma jamoasini qabul qilmoqda. O‘yin shialar motami hisoblanmish Ashuro kuniga to‘g‘ri kelgani bois ishqibozlar stadionda o‘zlarini an’analarga muvofiq tutishi talab etiladi, deb ma’lum qiladi “Sports.ru”.
Ashuro kunida shialar 680-yilda imom Husaynning o‘ldirilishini yodga olib, motam marosimlarini o‘tkazadi.
“Muhit Ashuro kuniga 100 foiz mos kelishi lozim. Butun stadion qoraga burkanadi. Olomon qarsak chalish o‘rniga ‘Yo Husayn’ deb qichqirishi lozim”, — ma’lum qildi oyatulloh Ali Muhovadiy Kirmoniy.
75 ming kishi sig‘adigan “Ozodi” stadionida 600 kvadrat metrli ikki qora bayroq ochiladi.
Janubiy Koreya futbolchilari va jurnalistlari mahalliy urf-odatlarga hurmat ko‘rsatishga tayyorligini bildirdi.
Eslatib o‘tamiz, JCh–2018 3-saralash bosqichining 4-turida Xitoyni qabul qilgan O‘zbekiston milliy terma jamoasi 2:0 hisobida zafar quchdi. Mazkur g‘alabadan keyin o‘zbekistonliklar ochkolar sonini 9 taga yetkazib oldi va Eron — Janubiy Koreya o‘yini yakuniga yetmagan bir paytda guruh peshqadamiga aylanib oldi.
Izoh (0)