Brent nefti narxi 10-oktabr, dushanba kuni 9-iyun kungi savdolar chog‘ida erishgan barreliga 52,86 dollarlik marradan oshdi va 53,41 dollargacha ko‘tarildi, deb yozadi “Vedomosti”. Bu joriy yildagi eng yuqori daraja bo‘lib, so‘nggi marta Brent bunday darajada 2015-yil oktabrda sotilgan.
Neftni eksport qiluvchi mamlakatlar tashkiloti (OPEK)ning sentabrdagi uchrashuvidan keyin 13 foizga o‘sgan Brent narxi Putinning bayonotidan keyin iyundagi qiymatidan oshib ketdi.
Gap shundaki, Rossiya prezidenti Vladimir Putin Rossiya OPEKning neft qazib chiqarish hajmini kamaytirish haqidagi bitimida ishtirok etishga tayyorligini ma’lum qildi. Sentabr oxiridagi uchrashuvda kartel mamlakatlari uni kuniga 32,5—33 million barrelgacha kamaytirishga kelishib olgan edi. 10-oktabr kuni Istanbulda nutq so‘zlar ekan, u, shuningdek, OPEKning 30-noyabrdagi sammitida ushbu g‘oya aniq kelishuvlarga aylanishiga umid bildirdi.
Izoh (0)