AQShdagi uchta eng yirik uyali aloqa operatorlari — AT&T, Sprint va Verizon yangi Samsung Galaxy Note 7 smartfonini sotishdan bosh tortdi, deb yozadi “RBK” Business Insider’ga tayanib. Germaniyaning T-Mobile kompaniyasi ham shunday qarorga keldi.
Ushbu ma’lumotni Samsung vakillari tasdiqladi. Ularning aytishicha, bu qurilmalarning qizib va yonib ketishi bo‘yicha xavflar qayd etilgani bilan bog‘liq. “Biz ularning qarorini hurmat qilamiz”, — dedi kompaniya vakili.
Business Insider ta’kidlashicha, ushbu telekommunikatsiya kompaniyalari AQShda Samsung telefonlari savdosi bilan shug‘ullanuvchi asosiy kompaniyalardir. Uyali aloqa operatorlarining bunday qarori Samsung kompaniyasi smartfonlari savdosi mamlakatda keskin tushib ketishiga olib kelishi mumkin.
Eslatib o‘tamiz, 2-sentabr kuni Samsung akkumulyator batareyalarida aniqlangan muammolar tufayli, Galaxy Note 7 smartfonlari savdosini to‘xtatgan va ularni yalpi tarzda qaytarib olgan edi.
OAVlarda almashtirib berilgan Galaxy Note 7 smartfonlari ham yonib ketayotgani haqida xabarlar paydo bo‘lgach, Samsung ushbu qurilmani ishlab chiqarishni to‘xtatdi.
Izoh (0)