Janubiy Koreyaning Samsung Electronics kompaniyasi Galaxy Note 7 smartfonlarini ishlab chiqarishni to‘xtatgani haqidagi xabarlardan keyin, Amerikaning Apple Inc. kompaniyasi aksiyalari narxi 10-oktabr, dushanba kungi savdolar chog‘ida yilning eng yuqori ko‘rsatkichini yangiladi, deb yozadi “Vedomosti”.
Toshkent vaqti bilan 23:09 da Apple Inc. aksiyalari Nasdaq birjasida 2,21 foizga qimmatlashib, donasi 116,58 dollardan sotila boshladi. Ya’ni kompaniya aksiyalari narxi o‘tgan yil 10-dekabrdan buyon birinchi marta 116,5 dollardan oshdi.
Eslatib o‘tamiz, 2-sentabr kuni Samsung akkumulyator batareyalarida aniqlangan muammolar tufayli, Galaxy Note 7 smartfonlari savdosini to‘xtatgan va ularni yalpi tarzda qaytarib olgan edi.
OAVlarda almashtirib berilgan Galaxy Note 7 smartfonlari ham yonib ketayotgani haqida xabarlar paydo bo‘lgach, Samsung ushbu qurilmani ishlab chiqarishni to‘xtatdi.
Izoh (0)