O‘zbekiston hukumati portalida ochilgan bosh vazirning virtual qabulxonasi (pm.gov.uz)da minglab o‘zbekistonliklar hal etilmagan masalalar, muammolar, ariza, shikoyat yoki takliflar bilan to‘g‘ridan-to‘g‘ri bosh vazirga murojaat qilmoqda, deya xabar bermoqda O‘zA.
Bunda murojaatni uch usulda — 210-00-00 yoki 10-00 qisqa raqamlariga qo‘ng‘iroq qilib (qo‘ng‘iroq O‘zbekiston bo‘yicha bepul bo‘lib, undan faqat statsionar telefonga qo‘ng‘iroq qilish narxi bo‘yicha haq olinadi), pm.gov.uz manzilidagi maxsus murojaat shaklini to‘ldirib yoki “O‘zLiDeP”ning hududiy tashkilotlariga borib yuborish mumkin.
Ma’lumotlarga ko‘ra, bosh vazirning virtual qabulxonasiga birinchi kuniyoq O‘zbekistonning turli joylaridan mingga yaqin ariza, shikoyat va takliflar tushgan bo‘lsa, bugun murojaatlar soni 20 mingdan oshib ketdi. “Hozirga qadar yuzlab muammolar tezda o‘z yechimini topdi”, — deyiladi O‘zA axborotida.
Shu yil mart oyida urganchlik Zulfiya Bekberganovaning 25 yoshli o‘g‘li Xurram Qurbonovning bosh miyasida qon quyilish holati aniqlangan. Shifokorlar uni xorijda davolatishni tavsiya qilgan. Muolaja uchun 8 ming dollar zarur edi. Z.Bekberganova o‘tgan vaqt mobaynida milliy valyutani xorijiy valyutaga konvertatsiya qilish bo‘yicha Xorazm viloyatidagi qator banklarga murojaat qilgan. Biroq ishi hal bo‘lmagan. Zulfiya opa so‘nggi umid sifatida shu yil 26-sentabrda Bosh vazirning virtual qabulxonasiga ariza jo‘natgan. Portalga murojaat qilganidan keyin oylar davomida yechilmagan muammo ikki kunda hal bo‘lgan.
Xorazm viloyati Xiva tumanida istiqomat qiluvchi Rohat Abdullayeva uyi buzilgach, 2014-yili yangi kottejga ko‘chib o‘tadi. Buzilgan uy shartnomada 139 million so‘mga baholanadi. Biroq bu mablag‘dan 38 million so‘mini hokimlik to‘lab bermaydi. U shu yil 26-sentabr kuni bosh vazirning virtual qabulxonasiga murojaat qilgan, 28-sentabr kuni buzilgan uy uchun qolgan 38 million so‘mni bankdagi omonat daftarchaga o‘tkazib berishgan. “Mahallamizdagi yangi kottejlarga ko‘chib o‘tgan 47 qo‘shnimda ham shu muammo bor edi, viloyat va tuman hokimligi ularga ham qarzdorlikni to‘lab bermoqda”, — deydi R.Abdullayeva.
“Mahallamizda elektr energiyasini kuniga o‘rtacha 12 soat o‘chirishar edi, bu muammoga yechim izlab, bir necha marta tuman hokimligi va elektr tarmoqlari tashkilotiga murojaat qildik, biroq foydasi bo‘lmadi. Shu yil 25-sentabrda bosh vazirning virtual qabulxonasiga elektron murojaat yubordik, 29-sentabrda mutasaddilar qishlog‘imizga kelib, vaziyatni o‘rgandi va uzluksiz elektr energiyasi bilan ta’minlash yo‘lga qo‘yildi”, — deydi Xorazm viloyati Gurlan tumani Saxtiyon qishlog‘ida yashovchi Jo‘rabek Bobojonov.
Ellikqal’alik Ilhombek Yo‘ldoshev Toshkent tibbiyot akademiyasining travmatologiya va ortopediya yo‘nalishi bo‘yicha magistraturasida 2-kurs talabasi. U bu yil shartnomaga pul topa olmagan. Shu bois Ellikqal’a tumanidagi barcha bank filiallariga ta’lim krediti ajratishni so‘rab, murojaat qilgan. Aytishicha, buning uchun zarur barcha hujjatni taxlab olib borsa-da, birorta bank xodimi ularni loaqal varaqlab ham ko‘rmagan. “Shunda bosh vazirning virtual qabulxonasi jonimga oro kirdi: murojaatim uch kunda hal bo‘ldi”, — deydi talaba.
Sirdaryo viloyati Xovos tumani Gulbahor shaharchasida yashovchi Muslimbek Xoliqberdiyev bu yil Guliston davlat universitetining ijtimoiy-iqtisodiy fakultetiga to‘lov-kontrakt asosida o‘qishga kirdi. Biroq ota-onasi shartnoma pulini to‘lash imkonini topa olmadi. Shu bois uning onasi Shoira Abdug‘afforova joriy yil 7-sentabrda “Agrobank”ning Xovos tumani filialiga ta’lim krediti so‘rab, murojaat qiladi. Vazirlar Mahkamasining 2001-yil 26-iyuldagi “Oliy o‘quv yurtlarida to‘lov-kontrakt asosida o‘qish uchun ta’lim kreditlari berish to‘g‘risida”gi qaroriga ko‘ra, tijorat banklari qarz oluvchining hujjatlarini 10 ish kunida ko‘rib chiqib, yozma xulosa berishi shart. Biroq Sh.Abdug‘afforova 20 kunda ham aniq javob ololmay, sarson-sargardon bo‘ladi. Vaziyat shu darajaga yetadiki, 30-sentabrgacha shartnoma puli to‘lanmasa, Muslimbek talabalikdan mahrum bo‘lishi aniq edi.
“Shartnoma pulini to‘lash muddatiga uch kun qolgan, nima qilishni bilmasdik, bank xodimlarini sudga beraylik, desak, sud bu ishni ko‘rib chiqishiga bir oy kerak — juda boshimiz qotgandi. 27-sentabr kuni bosh vazirning virtual qabulxonasi haqida eshitdimu, darhol murojaat qildim. Qarang, ertasi kuni ‘Agrobank’ o‘g‘limga ta’lim krediti ajratdi. Ishim hal bo‘ldi”, — deydi Sh.Abdug‘afforova.
Sirdaryo tumani Shirin ko‘chasi 8-uyda yashovchi Mirsaid Nizomov Bosh vazirning virtual qabulxonasiga mazkur hududda 5—6 yildan buyon tabiiy gazda muntazam uzilishlar bo‘layotganini, ushbu masalani hal etishda yordam so‘rab murojaat qilgan. Sirdaryo viloyati hokimligidan ma’lum qilishlaricha, murojaatni o‘rganish jarayonida mazkur hududdagi gaz quvurlari chindan ham ta’mirga muhtoj ekanligi aniqlangan. Tez kunlarda mazkur gaz quvurlari ta’mirlanib, tabiiy gaz ta’minoti to‘liq yo‘lga qo‘yiladi. Yoki Sirdaryo tumani Uchtepa ko‘chasi 49-uyda yashovchi Tatyana Karevaning hududda ichimlik suvi muammosini hal etishni so‘rab qilgan murojaati o‘rganilganda, bu yerda ichimlik suvi ta’minotini to‘liq yo‘lga qo‘yish uchun 500 metrga quvur yotqizish lozimligi aniqlandi. Ayni paytda bu boradagi loyiha-smeta hujjatlari tayyorlanib, 2017-yilgi Investitsiya dasturi asosida qurilish ishlari amalga oshirilishi belgilandi.
Shu yil 26-sentabrda Xorazm viloyati Yangiariq tumani Chiqirchi qishlog‘idan Hurmat Matyoqubov virtual qabulxonaga murojaat qilib, mazkur hududda toza ichimlik suvi yo‘qligi, quduqlar suvi sho‘r bo‘lgani uchun aholi 3 kilometr nariga borib, ichish uchun suv keltirayotganini aytadi. 2009-yili bu muammoni bartaraf etish uchun ish boshlangan, biroq chala qolgandi. “Murojaatimizdan ikki kun o‘tib, qishlog‘imizda qurilish ishlari boshlanib ketdi. Hozir 2009-yili yotqizilgan, ammo chirib ulgurgan quvurlarni ham qazib olib, yangilashyapti. Butun qishloq ahli necha yillik muammo hal bo‘lganidan o‘zida yo‘q xursand”, — deydi H.Matyoqubov.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.