Kuvayt fuqarosi AQSh sudiga Twitter orqali chaqirilgan birinchi kishi bo‘ldi

Kuvaytlik din arbobi Hajjoj bin Fahd al-Ajmiy Amerika sudiga Twitter ijtimoiy tarmog‘i orqali chaqirilgan birinchi odamga aylandi, deb yozadi “TASS”.

Kaliforniya shtati federal sudyasi Lorel Biler Yaqin Sharqda terrorchilik guruhlarini moliyalashtirish bilan shug‘ullanuvchi al-Ajmiy ishini ko‘rib chiqmoqda. Amerika sudiga kollektiv da’vo Iroq va Suriyada terrorchilar qurbonlariga aylangan Ossuriya nasroniylari tomonidan berilgan. Ular Kuvayt fuqarosidan ularga yetkazilgan zarar uchun tovon puli talab qilmoqda.

Sudda dastlabki eshitishlar chog‘ida Biler al-Ajmiyni sudga an’anaviy usullar yordamida chaqirib bo‘lmaydi, degan xulosaga keldi. Ammo sudya u Twitter’ning “faol foydalanuvchisi” ekanligini aniqladi, shundan so‘ng al-Ajmiyni gumonlanuvchiga tegishli elektron xabarni yuborish orqali sudga chaqirishga qaror qildi.

AQSh hukumati va BMT fikricha, al-Ajmiy “Jibhat an-Nusra” terrorchilik guruhi faoliyatini moliyalashtiradi.