“Fukusima”da radioaktiv suv sizib chiqdi

Avariyali “Fukusima-1” atom elektr stansiyasi hududida juda ko‘p miqdorda radioaktiv moddalarga boy suv sizib chiqqani aniqlandi, deb yozadi “Gazeta.ru” Tokyo Electric Power (TEPCO) kompaniyasiga tayanib.

Mutaxassislar ma’lumotlariga ko‘ra, yer ustidagi hovuzdan jami 32 litr suv oqib ketgan, uning har bir litrida beta-nurlantiruvchi moddalar miqdori 590 ming bekkerelga teng. Me’yorida esa dengizdagi suvning bir litriga 150 bekkerel to‘g‘ri kelishi kerak. Ta’kidlanishicha TEPCO xodimlari radioaktiv suyuqlikning bir qismini boshqa hovuzga tortib olgan.

Ayni paytda “Fukusima-1”da tuproqni muzlatish ishlari olib borilmoqda, bu radioaktiv suyuqlikning sizib chiqishi va yer osti suvlari zararlanishi oldini olish imkonini beradi.