AQSh, Yaponiya va Janubiy Koreya HHKning 80 dan ortiq samolyotlari Alyaskadagi harbiy mashg‘ulotlarda qatnashmoqda

Red Flag-Alaska (“Qizil bayroq — Alyaska”) harbiy-havo taktik o‘quv mashg‘ulotlari 6-oktabr, payshanba kuni Amerikaning Alyaska shtatida boshlandi, deya xabar bermoqda “TASS”.

“Red Flag-Alaska AQSh va uning ittifoqdoshlari harbiy uchuvchilariga, ekipajiga hamda tezkor ko‘mak personaliga butun dunyo bo‘ylab turli ssenariylarga tayyorgarlik doirasida havo jangi olib borish malakasini mashq qilish va yaxshilash imkoniyatini beradi”, — dedi Amerikaning Eyelson harbiy-havo bazasi matbuot xizmati.

Harbiy mashg‘ulotlarda 80 dan ortiq samolyot va yuzlab ekipaj a’zolari, texnik personal va tezkor ko‘mak mutaxassislari ishtirok etadi. Ular orasida Janubiy Koreyaning Osan harbiy bazasi ikkita eskadrilyasi va AQSh harbiy-havo kuchlarining Yaponiyadagi Kadena bazasi eskadrilyasining qiruvchilari bor. Qolgan jangovar mashinalar Amerikaning Kaliforniya, Gavayi va Alyaska shtatlaridagi bazalaridan yetib keldi. Ishtirokchilar bo‘linmalarining bir qismiga Isroil, Shvetsiya va Yangi Zelandiya vakillik qilmoqda.