Toshkentda dzyudo bo‘yicha Gran-pri turkumiga kiruvchi xalqaro turnir boshlandi, deb xabar beradi O‘zA.
Madaniyat va sport ishlari vazirligi, Milliy olimpiya qo‘mitasi, O‘zbekiston dzyudo federatsiyasi, Xalqaro dzyudo federatsiyasi (IJF), qator vazirlik va tashkilotlar bilan hamkorlikda to‘rtinchi bor tashkil etilayotgan musobaqada dunyoning yigirmaga yaqin davlatidan 135 sportchi o‘n to‘rt vazn toifasida sovrinli o‘rinlar uchun kurashmoqda.
Xalqaro dzyudo federatsiyasi 2013–2016-yillarda Gran-pri turkumiga kiruvchi turnirlarni Toshkent shahrida o‘tkazishga qaror qilgan. O‘zbekiston dzyudo federatsiyasi tomonidan bu yilgi Gran-pri turnirini ham yuqori saviyada o‘tkazish, musobaqa tashkil etiladigan joyning xalqaro standartlarga mos jihozlanishini ta’minlash bo‘yicha izchil ishlar olib borildi, deyiladi xabarnomada.
“O‘zbekiston” sport majmuasida 6-oktabr kuni nufuzli musobaqaning ochilish marosimi bo‘ldi.
“O‘zbekistonda sportni rivojlantirish bo‘yicha amalga oshirilayotgan keng ko‘lamli islohotlar o‘zining yuksak samaralarini bermoqda, — dedi Osiyo dzyudo uyushmasi raisi Obeyd Al-Anziy. — Bu mamlakatingizda nufuzli sport anjumanlarining muntazam o‘tkazilayotgani, o‘zbekistonlik sportchilarning xalqaro sport arenalarida yuksak g‘alabalarga erishayotganida yaqqol namoyon bo‘lmoqda. Bu galgi turnir ham yuqori saviyada o‘tishiga ishonchim komil”.
Bu yilgi turnirda O‘zbekiston sharafini tajribali sportchilar bilan birga yosh dzyudochilar ham himoya qilmoqda. Musobaqaning dastlabki kunida Muhriddin Tilovov shohsupaning eng yuqori pog‘onasiga ko‘tarilgan bo‘lsa, Sharofiddin Lutfullayev uchinchi o‘rinni egalladi. Xotin-qizlar o‘rtasida Diyora Keldiyorova kumush, Nodira Gulova, Muqaddas Kubeyeva, Guloyim Jumaboyeva bronza medallarni qo‘lga kiritdi.
Musobaqaning ochilish marosimida O‘zbekiston Respublikasi Bosh vazirining o‘rinbosari A. Ikromov so‘zga chiqdi.
Izoh (0)