“Tottenhem”da asosiylardan biriga aylangan Son Xyon Minni 21 oylik armiya kutayotgani ma’lum qilindi

Londonning “Tottenhem” klubida to‘p surayotgan janubiy koreyalik Son Xyon Minning Angliyadagi kelajagi uni 21 oylik harbiy xizmat kutib turgani uchun so‘roq ostida, deb yozdi “Chempionat” The Telegraph nashriga asoslanib.

24 yoshli Son Xyon Min Janubiy Koreyadagi majburiy harbiy xizmatni o‘tamagan bo‘lib, u buni 28 yoshiga qadar amalga oshirishi kerak bo‘ladi.

Harbiy xizmatdan qutulib qolishning yo‘li bor bo‘lib, koreyalik sportchi Osiyo yoki Olimpiada o‘yinlarida oltin medalni qo‘lga kiritishi kerak. Son Xyon Min Rio—2016 Olimpiadasida Janubiy Koreya safida to‘p surdi va turnirni chorak finalda yakunladi.

2018-yil bo‘lib o‘tadigan Osiyo o‘yinlari futbolchini qutqarib qolishi mumkin. Buning uchun u Janubiy Koreya termasi safida musobaqa g‘olibligini qo‘lga kiritishi kerak. Muammo shundaki, bu vaqt oralig‘ida “Tottenhem” futbolchining kelajagi mavhum ekanini inobatga olib, u bilan shartnomani bekor qilishi ham mumkin.

Son Xyon Min Chempionlar Ligasining Moskvada “SSKA”ga qarshi bo‘lib o‘tgan o‘yinida g‘alaba golini urgan bo‘lsa, Premyer-Liganing yangi mavsumida 4 ta gol urishga ulgurgan.