Osiyo o‘yinlaridagi plyaj futbolida O‘zbekiston terma jamoasi Afg‘onistonga imkoniyatni boy berdi
Ahad Yusupov bosh murabbiyligidagi O‘zbekiston plyaj futboli terma jamoasi Vyetnamda davom etayotgan sohil sport turlari bo‘yicha Osiyo o‘yinlarining chorak finalida Afg‘onistondan yengildi.
Guruh bosqichida BAA bilan durang o‘ynab, penaltilar seriyasiga ko‘ra zafar quchgan o‘zbekistonliklar, afg‘onlarga qarshi o‘yinda 9 ta gol o‘tkazib yubordi va 4 ta gol urdi.
Yarim finalga, shuningdek, Tailandni 4:1 hisobida yenggan Ummon, BAA ustidan 6:2 hisobida zafar quchgan Yaponiya va mezbon Vyetnamni penaltilar seriyasiga ko‘ra ortda qoldirgan Livan yetib keldi.
Final ostonasida Livan va Yaponiya o‘zaro kuch sinashsa, Afg‘oniston termasi Ummonni sinovdan o‘tkazadi.
Ma’lumot uchun, O‘zbekiston plyaj futboli terma jamoasi safida “Paxtakor”dagi o‘yinlari orqali tanish bo‘lgan hujumchi Zayniddin Tojiyev ham to‘p surdi. Uning qatorida O‘zbekiston futzal terma jamoasi bilan Jahon Chempionatiga bora olmagan Jamoliddin Sharipov hamda Andrey Shlyoma ham sohil futbolida o‘ynadi.
