Gamburg shahrining shaxsiy ma’lumotlarni himoya qilish va axborot erkinligi bo‘yicha maxsus vakili Yoxannes Kaspar 27-sentabr, seshanba kuni Facebook ijtimoiy tarmog‘iga WhatsApp messenjerining germaniyalik foydalanuvchilariga oid ma’lumotlarni to‘plash, saqlash va undan foydalanishni man etuvchi qaror chiqardi. Bu haqda, obmudsmen rasmiy saytidagi bayonotga asoslanib, “TASS” xabar bermoqda.
Foto: EPA
Kaspar, shuningdek, Facebook’ni serverlarda to‘planib qolgan mavjud ma’lumotlarni o‘chirib tashlashga chaqirdi.
Hujjatda alohida ta’kidlanishicha, ikki yil muqaddam messenjer xarid qilinganida kompaniya vakillari foydalanuvchilarning ma’lumotlari birlashtirilmasligi haqida va’da bergan edi.
“Bu qaror WhatsApp’ning 35 million germaniyalik foydalanuvchisini himoya qilishi kutilmoqda. Ular bu borada o‘zlari qaror qabul qilishi lozim, Facebook esa ularga shunday imkoniyatni taqdim etadi”, — ma’lum qildi ombudsmen.
