Kanada va AQSh MOQlari NHL xokkeychilarining Pxyonchxan–2018 qishki Olimpiadasida ishtiroki uchun pul to‘lashga tayyor

Kanada va AQSh Milliy olimpiya qo‘mita (MOQ)lari Milliy Xokkey Ligasi (NHL) o‘yinchilarining Pxyonchxan—2018 qishki Olimpiadasida ishtirok etishi uchun pul to‘lashga tayyor. Bu haqda Rossiya xokkey federatsiyasi prezidenti, Xalqaro xokkey federatsiyalari kengashi (IIHF) a’zosi Vladislav Tretyak ma’lum qildi, deb xabar bermoqda “TASS”.

Avvalroq IIHF rahbari Rene Fazel tashkilot Xalqaro olimpiya qo‘mitasiga Olimpiada musobaqalarida NHL xokkeychilarining sug‘urtasi va safar xarajatlarini qoplab berishda yordam ko‘rsatishni so‘rab iltimos bilan murojaat qilishi haqida ma’lum qilgandi.

Vladislav Tretyakning qayd etishicha, NHL rahbariyati liga xokkeychilarining 2018- va 2022-yilgi qishki Olimpiya o‘yinlaridagi ishtiroki IIHF va XOQ o‘rtasidagi munosabatlarga bog‘liq ekaniga e’tibor qaratgan.

Milliy Xokkey Ligasi o‘yinchilarining Olimpiada o‘yinlaridagi sug‘urtasi uchun IIHF va XOQga 10 million dollar kerak bo‘ladi. Shu munosabat bilan, NHL vakillari 2018-yilgi qishki Olimpiadani o‘tkazib yuborish ehtimoli bor.

Tashkilotlar mazkur muammo yechimini topish maqsadida XOQ va milliy federatsiyalar bilan hamkorlikda muzokaralar olib bormoqda. Ushbu masala yuzasidan qaror 2017-yilning yanvar oyi o‘rtalarida qabul qilinishi kerak.

Ma’lumot uchun, NHL xokkeychilari 1998-yildan buyon qishki Olimpiadalarda ishtirok etib kelmoqda.