Suriyaning Aleppo provinsiyasida so‘nggi kunlarda kuzatilgan otishmalar va jangovar harakatlar natijasida 200 dan ziyod kishi halok bo‘ldi, deya xabar bermoqda “TASS” BMT bosh kotibi maxsus vakili Staffan de Misturaga tayanib.
Uning so‘zlariga ko‘ra, provinsiyada o‘ldirilgan fuqarolar soni 213 kishi deya baholanmoqda, shulardan 139 nafari sharqiy Aleppoda, 74 nafari esa qishloq hududlarda halok bo‘lgan. U jangovar harakatlar qurbonlari orasida o‘nlab ayollar va bolalar borligini ta’kidladi.
De Mistura sharqiy Aleppo aholisining 275 ming nafari bir necha haftadan buyon qamalda qolganini ma’lum qildi. “Ularning barchasi terrorchilar bo‘lishi mumkin emas”, — dedi emissar.
U Xavfsizlik Kengashini tinch aholi va fuqarolik infratuzilmasi himoyasini ta’minlashga, jangovar harakatlarda har haftada 48 soatlik gumanitar tanaffuslarga erishishga hamda xastalar va yaralanganlarni evakuatsiya qilish bo‘yicha operatsiya o‘tkazishga chaqirdi.
Izoh (0)