Turkiya o‘z kosmik agentligini yaratmoqchi

Turkiya transport, dengizchilik va aloqa vazirligi milliy kosmik agentlikni yaratish bo‘yicha qonun loyihasi ustidagi ishlarni deyarli yakunlaganini ma’lum qildi. Vazir Ahmat Arslonning ma’lum qilishicha, hujjat keyingi yil parlament muhokamasiga kiritiladi.

“Turkiya kosmik agentligiga asos solinishi bilan tezkor texnik o‘sishga erishamiz deb o‘ylayman”, — uning so‘zlarini keltiradi “TASS”.

Vazirning qo‘shimcha tarzda aytib o‘tishicha, agentlik doirasida kosmik sohadagi strategiyalar bo‘yicha oliy kengash yaratilib, uning tarkibiga sohaga aloqador vazirlar kiradi.

Qonun loyihasini va yangi struktura yo‘riqnomasini ishlab chiqishda NASA va boshqa kosmik agentliklarning tegishli hujjatlaridan foydalanildi.