Hindistonda bo‘lib o‘tayotgan futbol bo‘yicha o‘smirlar o‘rtasidagi Osiyo Chempionatida chorak finalga yo‘llanma olgan barcha jamoa nomi ma’lum bo‘ldi.
“A” guruhi vakillari 21-sentabr kuni barcha masalaga oydinlik kiritgan bo‘lsa, 22-sentabr kuni “B” va “C” guruhlarida ham 3-tur o‘yinlari yakunlandi.
Turnirni 0:7 hisobidagi mag‘lubiyat bilan boshlagan Vyetnam terma jamoasi chorak finalga yo‘llanma oldi. Avstraliyani 3:2, Qirg‘izistonni 3:1 hisobida mag‘lub etgan vyetnamliklar Jahon Chempionati chiptasi uchun Eronga qarshi saf tortadigan bo‘ldi.
“C” guruhida esa Janubiy Koreya o‘smirlar terma jamoasi muvaffaqiyatsizlikka uchradi. 3-turda Malayziyaning 3:0 hisobida mag‘lub etilgani ham jamoaga yordam bera olmadi. Iroq hamda Ummon o‘zaro 1:1 hisobida durang o‘ynab, koreyaliklarni guruhda qoldirib ketdi.
Bugun — 23-sentabr kuni “D” guruhiga ham yakun yasaladi. O‘zbekiston va KXDR termalari guruh missiyasini muvaffaqiyatli hal qilgan bo‘lib, ular o‘zaro o‘yin orqali guruh g‘olibi nomiga oydinlik kiritib beradi.
Bellashuvda qayd etiladigan ehtimoliy durang natija ham KXDRga guruh yetakchiligini taqdim etadi. O‘zbekiston “D” zonasini peshqadam sifatida yakunlay olsa, Jahon Chempionati chiptasi o‘ynaladigan uchrashuvda Iroqqa to‘qnash keladi. Guruhda karvonboshilik KXDRga nasib qilsa, O‘zbekistonning chorak finaldagi raqibi Ummon bo‘ladi.
O‘zbekiston va KXDR termalari ishtirokidagi o‘yin Toshkent vaqti bilan 18:30 da start oladi. “Sport” telekanali uchrashuvni 18:25 dan boshlab jonli namoyish etadi. Mtrk.uz saytida ko‘rsatilganidek, “Lokomotiv” — “Obod” o‘yini 17:55 da emas, balki 22:20 da efir yuzini ko‘radi, deb “Daryo”ga ma’lumot berildi.
Izoh (0)