Facebook ijtimoiy tarmog‘i asoschisi Mark Sukerberg va uning rafiqasi Prissilla Chan yaqin o‘n yil davomida mavjud barcha kasalliklar bilan kurash bo‘yicha tadqiqot loyihasiga 3 milliard dollar investitsiya kiritmoqchi. Bu haqda er-xotin San-Fransiskodagi matbuot anjumanida ma’lum qildi, deb yozadi “TASS”.
Ushbu tashabbus bolalik yoshidan boshlab barcha ehtimoliy kasalliklarni davolash, oldini olish va nazorat o‘rnatish usullarini ishlab chiqishga qaratilgan. Xususan, ko‘rsatilgan summaning 600 million dollari kasalliklarni o‘z vaqtida aniqlash va oldini olish choralarini ishlab chiqish bo‘yicha tadqiqot markazi yaratishga sarflanadi.
San-Fransiskoda joylashadigan yangi markaz, xususan, “har qanday yuqumli kasalliklarni aniqlash va qon aylanishini nazorat qilish”ga, shuningdek, “hujayralar atlasini” yaratishga qodir bo‘lgan maxsus chipni ishlab chiqadi.
Sukerbergning qo‘shimcha qilishicha, yangi tashabbus Ebola, Zika va OIV kabi viruslarga qarshi yangi tibbiy texnologiyalar, testlar va vaksinalar ishlab chiqishni ham nazarda tutadi. Facebook rahbari qo‘yilgan maqsadlarning barchasiga joriy yuz yillik oxirigacha erishilishiga umid bildirdi.
Izoh (0)