Checheniston prokurori yordamchisi Moskvadagi to‘yda o‘q otgani tufayli ishdan bo‘shatildi

Chechenistonning Shalinskiy tumani prokurorining yordamchisi Magomed Guchigov Moskva shahrida bo‘lib o‘tgan to‘y kortejida mashinadan turib o‘q otgani bois ishdan bo‘shatildi. Bu haqda “RBK” xabar bermoqda.

Rossiya bosh prokuraturasi rasmiy vakili Aleksandr Kuryonniyning ma’lum qilishicha, Checheniston prokurori Sharpuddi Abdulqodirov Guchigovning ishdan bo‘shatilishi to‘g‘risidagi buyruqni 21-sentabr kuni imzolagan. Sabab sifatida yordamchi prokurorlik qasamyodini buzgani va prokuratura ishchisi g‘ururini toptovchi ishlar qilgani ko‘rsatilmoqda.

Bundan tashqari, Guchigov voqea joyiga yetib kelgan politsiyadan prokuraturada ishlashini yashirib, bu bilan tergovning borishiga to‘sqinlik qilgan.

11-sentabr kuni Moskva janubidagi Kashirskiy shossesida to‘y kortejida ishtirok etayotgan ikki avtomobil haydovchisi havoga o‘q uzgan edi. Porsche Panamera va Bentley Continental haydovchilari — Magomed Guchigov va Vasiliy Yesenkin o‘sha kuni qo‘lga olingan edi.