Trampning shtabi: Obama ma’muriyati IShID tomonidan bo‘ladigan “xavf ko‘lamini kamaytirib ko‘rsatadi”

AQSh ma’muriyati IShID terrorchilik guruhi tug‘diradigan xavf ko‘lamini kamaytirib ko‘rsatadi. Bunday fikrni Respublikachilar partiyasidan AQSh prezidenti lavozimiga nomzod Donald Tramp saylov shtabi xodimi Jeyson Miller bildirdi, deb yozadi “TASS”.

“Oq uy IShID bilan axborot urushini olib borayotganini aytsa va bu AQSh hududidagi ketma-ket terrorchilik hujumlaridan so‘ng kuzatilsa, barchamiz tashvishlanishimiz kerak, — deyiladi bayonotda. — Iroq va Suriyadagi amerikalik harbiy xizmatchilar IShID bilan jangda old qatorlarda turibdi va bu urushda biz odamlarimizni yo‘qotyapmiz. Obama ma’muriyati o‘zi o‘sishiga imkoniyat bergan xavfning ko‘lamini kamaytirib ko‘rsatayotgani bizga terrorizmga qarshi kurashda yangi rahbar kerakligini yana bir bora eslatib qo‘yadi”.

Bayonotda Trampning raqibi — Demokratik partiyadan nomzod Hillari Klinton “Obama ma’muriyatining IShIDga nisbatan muvaffaqiyatsiz strategiyasini qo‘llab-quvvatlagani” ta’kidlanadi.