AQShning BMTdagi doimiy vakili Samanta Pauer Rossiya TIV rasmiy vakili Mariya Zaxarovaning Suriya armiyasiga qaratilgan zarbalar Vashington IShIDni himoya qilayotgani to‘g‘risida xulosaga kelishga sabab bo‘layotgani haqidagi bayonotiga keskin munosabat bildirdi. Bu haqda “TASS” xabar bermoqda.
“Rossiyaning rasmiy vakili nima uchundir IShIDning sherigi ekanimiz, hatto ularni himoya etishga harakat qilayotganimiz haqidagi xulosaga kelibdi. Aslidachi? Bu guruh Amerika fuqarolarini qatl etgan edi. Biz maqsadi mazkur guruhni yo‘q qilish bo‘lgan 67 mamlakatdan iborat koalitsiyaga rahbarlik qilamiz. IShID nazorat qilayotgan hududining 40 foizini yo‘qotdi. Biz bunga jiddiy qaraymiz, o‘yin o‘ynayotganimiz yo‘q. Bizni sheriklikda gumon qilayotgan rasmiy vakil uyalishi kerak”, — ta’kidladi diplomat.
Qog‘oz orqali o‘qib berilgan chiqishdan so‘ng Samanta Pauer jurnalistlarning savollariga javob berishdan bosh tortdi.
Eslatib o‘tamiz, AQSh boshchiligidagi koalitsiya samolyotlari 17-sentabr, shanba kuni Dayr az-Zavr shahri yaqinida Suriya armiyasi marralariga to‘rtta aviazarba bergani, buning oqibatida 62 nafar harbiy xizmatchi halok bo‘lib, yuzga yaqin kishi yaralangani haqida xabar berilgandi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)