AQSh vitse-prezidentligiga nomzod Pens sog‘lig‘i haqidagi ma’lumotlarni e’lon qildi

AQSh vitse-prezidentligiga Respublikachilar partiyasidan nomzod Maykl Pens sog‘lig‘i haqidagi shifokor ma’lumotnomasini e’lon qildi. Bu haqda Associated Press agentligi ma’lum qildi, deb yozadi “TASS”.

Shifokor Maykl Bask tomonidan berilgan qaydnomada 57 yoshli Pensning sog‘lig‘i juda yaxshi ekanligi aytilgan. Respublikachini ko‘rikdan o‘tkazgan Bask Indiana shtatining gubernatori bo‘lgan Pens sog‘lom hayot tarziga rioya etishi, chekmasligi va alkogol iste’mol qilmasligi hamda haftasiga kamida to‘rt marta sport bilan shug‘ullanishini ta’kidlaydi.

Nomzod qabul qiladigan yagona dori mavsumiy allergiyaga qarshi vositadir.

Shu bilan birga, ma’lumotnomada Pens shu vaqtga qadar boshdan kechirgan xastaliklarga ham to‘xtalib o‘tilgan.

Avvalroq AQSh prezidentligiga Respublikachilar partiyasidan nomzod Donald Tramp ham teleko‘rsatuvlardan birida shifokor ma’lumotnomasini taqdim etgan va sog‘lig‘i juda mustahkam ekanligini ta’kidlagan edi.