AQSh koalitsiyasi samolyotlari Suriya armiyasi pozitsiyalariga zarbalar berdi
Suriya Qurolli kuchlari qo‘mondonligi vakili AQSh boshchiligidagi koalitsiya samolyotlari Suriyaning Deyr-az-Zor shahri yaqinida Suriya armiyasi pozitsiyalariga zarba berganini ma’lum qildi. Reuters xabariga ko‘ra, bunday bayonot Suriya davlat televideniyesi efirida yangragan, deb yozadi “RBK”.
Rossiya mudofaa vazirligi AQSh boshchiligidagi koalitsiya Suriya armiyasi pozitsiyalariga aviazarbalar bergani haqidagi ma’lumotni tasdiqladi. Rossiya mudofaa vazirligi rasmiy vakili general-mayor Igor Konashenkov xalqaro koalitsiya samolyotlari to‘rtta aviazarba bergani, natijada 62 nafar harbiy xizmatchi halok bo‘lib, yuzga yaqin kishi yaralanganini aytdi.
Uning so‘zlariga ko‘ra, zarbalarni ikkita F-16 samolyoti va ikkita A10 samolyoti 17-sentabr, shanba kuni Toshkent vaqti bilan 19:00 va 19:50 oralig‘ida Deyr-az-Zor shahridagi aerodrom yaqinida IShID qurshovida bo‘lgan Suriya hukumat kuchlari bo‘linmalariga bergan. Konashenkov koalitsiya samolyotlari Suriya havo hududiga Iroq tomonidan kirganini ta’kidladi.
Suriyaning Deyr-az-Zordagi qo‘mondonligidan olingan ma’lumotga tayanib, u IShID jangarilari zarbadan keyin darhol hujumga o‘tganini ta’kidladi. “Agar ushbu havo zarbasi nishonning noto‘g‘ri koordinatalari tufayli berilgan bo‘lsa, unda bu Amerika tomonining Suriya hududida terrorchilik guruhlariga qarshi bo‘lgan o‘z harakatlarini Rossiya bilan muvofiqlashtirishni tinimsiz istamasligi oqibatidir”, — deya ta’kidladi Rossiya harbiy muassasasi rasmiy vakili.
Reuters Londondagi Inson huquqlari bo‘yicha Suriya observatoriyasiga tayanib ma’lum qilishicha, aviazarbalar natijasida kamida 80 nafar suriyalik harbiy xizmatchi halok bo‘ldi.
AQSh rahbarligidagi xalqaro koalitsiya vakillari bu borada izoh berganicha yo‘q.
