BMT Xavfsizlik kengashining Suriya bo‘yicha maslahatlashuvlari bekor qilindi

BMT Xavfsizlik kengashining Rossiya va AQShning Suriya bo‘yicha kelishuvi muhokama qilinishi rejalashtirilgan maslahatlashuvlari bekor qilindi. Bu haqda BMT matbuot xizmati ma’lum qildi, deb yozadi “Interfaks”.

Dastlab uchrashuv 16-sentabr, juma kuni 17:30 da yopiq eshiklar ortida o‘tkazilishi rejalashtirilgan edi. Uchrashuv davomida Rossiya va AQSh 9-sentabr kuni Jenevada Suriya masalasi bo‘yicha erishilgan kelishuv haqida so‘zlab berishi rejalashtirilgan edi.

Bundan tashqari, Rossiya tomoni avvalroq Suriya bo‘yicha kelishuv BMT Xavfsizlik kengashining tegishli rezolyutsiyasi bilan mustahkamlanishi haqida fikr bildirgan edi.

Shunga qaramasdan, kuni kecha Rossiya va AQSh Suriya bo‘yicha kelishuvni chop etish zarur yoki shart emasligi haqidagi qarashlari turlicha ekanligi ma’lum bo‘ldi.