BMT Bosh Assambleyasining umumsiyosiy diskussiyasi o‘tkaziladigan BMTning Nyu-Yorkdagi bosh qarorgohida kelasi hafta 500 dan ortiq forumlar, konferensiyalar va boshqa tadbirlar, shuningdek, 1,1 mingta ikki tomonlama uchrashuvlar rejalashtirilgan, deb yozadi “TASS” BMT bosh kotibi rasmiy vakili Stefan Dyujarrikka tayanib.
“Bugungi kun holatiga ko‘ra, biz bosh kotib ishtirokisiz ikki tomonlama uchrashuvlar o‘tkazish uchun 1100 ta so‘rov qabul qildik”, — dedi u. Uning so‘zlariga ko‘ra, bu raqam o‘tgan yilgidan kamroq, o‘shanda umumsiyosiy diskussiya doirasida 1678 ta muzokara olib borilgan edi. Kelasi hafta rasmiy va norasmiy uchrashuvlar va anjumanlarni o‘z ichiga oladigan 545 ta tadbirlar kutilmoqda.
20-sentabrdan 26-sentabrgacha davom etadigan Bosh Assambleya umumiy muzokaralaridagi ishtirokini 67 nafar davlat rahbari, 5 nafar vitse-prezident, 49 nafar hukumat rahbari va 50 ga yaqin vazirlar tasdiqladi.
Shuningdek, Dyujarrik ma’lum qilishicha, vakolati shu yilning oxirida tugaydigan BMT bosh kotibi Pan Gi Mun kelasi hafta mobaynida dunyo yetakchilari va vazirlar bilan 124 ta ikki tomonlama uchrashuv o‘tkazishni hamda tashkilot bosh qarorgohidagi 62 ta tadbirda qatnashishni rejalashtirmoqda.
Eslatib o‘tamiz, BMT Bosh Assambleyasi 2-sentabr kuni 78 yoshida vafot etgan O‘zbekiston Birinchi Prezidenti Islom Karimov xotirasiga hurmat bajo keltirib, majlisni bir daqiqalik sukut bilan boshladi.
Izoh (0)