Turkiyada teraktlar tayyorlashda gumonlanib, to‘rt kishi qo‘lga olindi

Turkiya hukumati IShID guruhiga aloqadorlikda gumon qilib, to‘rt kishini qo‘lga oldi, deb yozadi “TASS” Haberler yangiliklar portaliga tayanib. IShID Germaniya va Buyuk Britaniyaning Turkiyadagi elchixonalari binolari yonida teraktlar uyushtirishni rejalashtirayotgan bo‘lishi mumkin.

Gumonlanuvchilarning uch nafari Anqarada, biri esa Istanbulda hibsga olingan. Ammo ayni paytda ularning IShIDga aloqadorligini tergovchilar isbotlab berganicha yo‘q.

Politsiya hamda Germaniya va Buyuk Britaniya elchixonalari xodimlari ma’lumotlariga ko‘ra, IShID ushbu diplomatik vakolatxonalarga 13—17-sentabr oralig‘ida hujumlar uyushtirishi mumkin. Portal yozishicha, bunday tezkor ma’lumot olinishi munosabati bilan ichki ishlar vazirligi tomonidan choralar ko‘rildi.

Elchixonalar aholini qabul qilishni to‘xtatdi va taqdim etiladigan xizmatlar turlarini vaqtinchalik chekladi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.