Saudiya Arabistoni harbiy-havo kuchlarining Yaman poytaxti Sana shahri yaqiniga bergan aviazarbalari oqibatida 21 kishi halok bo‘ldi, o‘nlab odamlar tan jarohati oldi. Bu haqda, Reuters’ga asoslanib, “RIA Novosti” xabar bermoqda.
Yaman poytaxtidan shimol tomonda joylashgan Arhab tumaniga yo‘naltirilgan aviazarbalar 10-sentabr, shanba kuni berilgan. Bombardimon vaqtida ishchilar suv quduqlarini ochish bilan band bo‘lgan, shu sababli Saudiya aviatsiyasi qazish qurilmalarini raketa qurilmalari deb tushungan bo‘lishi mumkin.
Saudiya Arabistoni boshliq koalitsiya hozircha mazkur hodisaga hech qanday izoh bergani yo‘q. Avvalroq koalitsiya kuchlari tinch aholiga qarshi kuch ishlatmasligini alohida ta’kidlab o‘tgan edi.
Yamandagi isyonchi-xusiylar va hukumat kuchlari o‘rtasidagi qurolli qarama-qarshilik ikki yildan beri davom etmoqda. 2015-yil martidan beri hukumat kuchlarini Saudiya Arabistoni boshliq arab koalitsiyasi qo‘llab-quvvatlamoqda va u Yamandagi isyonchilarning marralariga aviazarbalar bermoqda.
BMT hisob-kitoblariga ko‘ra, Yamandagi qurolli nizo boshlanganidan beri 10 mingdan ortiq odam halok bo‘ldi.
Izoh (0)