Rossiya haddan ziyod yog‘inlar bu yil hosildorlik kamayishiga olib kelgan Yevroittifoqni ortda qoldirib, 2016—2017-yillarda dunyodagi eng yirik bug‘doy eksportchisiga aylanishi mumkin. BMT oziq-ovqat va qishloq xo‘jaligi tashkiloti (FAO) tomonidan tarqatilgan byulletenda shunday taxmin qilingan, deya xabar beradi “TASS”.
FAO 2016-yili dunyo bo‘yicha g‘alla o‘simliklari yetishtirilishi bashoratini 2566 million tonnagacha oshirdi, bu iyul oyi bashoratlaridan 22 million tonnaga ko‘p. Bunday o‘sish birinchi galda bug‘doy hosili rekord darajada (741 million tonnagacha) bo‘lishi kutilayotgani bilan bog‘liq.
Xususan, Avstraliya, Shimoliy Amerika, Hindiston va Rossiyada o‘sish sezilarli ravishda yuqori bo‘lishi taxmin qilinmoqda. Ma’lumot uchun, Rossiya 31-iyun kuni yakunlangan qishloq xo‘jaligi yilida chet elga 33,9 million tonna bug‘doy eksport qilgandi.