Avval xabar berganimizdek, Apple kompaniyasi 7-sentabr kuni yangi iPhone 7 va 7 Plus smartfonlarini taqdim etdi va bir kecha-kunduz o‘tar-o‘tmas, qurilmalardagi ilk muammoni tan oldi, deb yozadi “Hi-tech.mail.ru”. Yangi “qora oniks” (Black Jet) rang yechimidagi smartfonlar oson tirnaladigan bo‘lib chiqdi.
Yangi iPhone 7 va 7 Plus’ning orqa paneli 7000 seriayli alyuminiydan tayyorlangan. Ammo metallga ishlov berish texnologiyasi o‘zgardi: “qora oniks” rangidagi qurilmalarda jiloli effektga ega bo‘lish uchun to‘qqiz pog‘onali anodlash (metall sirtini elektroliz usulida oksid pardasi bilan qoplash) va silliqlash texnologiyasidan foydalanildi. U yon tomonlarga yaqin joyga siljigan plastik detallarni deyarli butunlay sezilarsiz holga keltirib, metall va shisha o‘rtasidagi chegarani yo‘qotdi.
Ammo iPhone 7 va 7 Plus’ga barmoq izi tez o‘tirib qoladi. Bu hayratlanarli emas, bu kutilgandi ham, biroq ancha jiddiyroq muammo bor. “Korpus yuzasining mustahkamligi bo‘yicha Apple’ning boshqa anodlangan mahsulotlaridan qolishmaydi, ammo foydalanish jarayonida unda tirnalish izlari paydo bo‘lishi mumkin. Agar bu sizni tashvishga solsa, iPhone’ingizni himoya qilish uchun g‘ilof sotib olishni maslahat beramiz”, — deb yozdi Apple.
Eslatib o‘tamiz, Apple kompaniyasi yangi — iPhone 7 va 7 Plus smartfonlarini, shuningdek, Apple Watch 2 “aqlli” soatini rasman taqdim etdi. Smartfonning ranglari qatoriga Black — jiloli qora va Jet Black qoplamasi qo‘shildi, u antennalar ko‘rinmasligini ta’minlaydi.