Kim Chen In 5-sentabr, dushanba kuni KXDR strategik qo‘shinlari tarkibiga kiruvchi “Xvason” artilleriya qismlarida modernizatsiyalangan ballistik raketalar parvoziga rahbarlik qildi, deb yozadi “TASS” Koreya markaziy telegraf agentligiga tayanib.
Koreya Mehnat partiyasi va respublika Davlat kengashi raisi “yadro kuchlarini har tomonlama mustahkamlash orqali, daf qilish harbiy salohiyatini yangi bosqichga chiqarish zarur deb hisoblaydi”.
“KXDRda vodorod bombasi sinovi o‘tkazilgan tarixiy yilda yadro kuchlarini mustahkamlashda yangi muvaffaqiyatlarga erishish kerak”, — dedi davlat rahbari.
“Xvason” artilleriya qismlari oldiga “kutilmagan vaziyatlar yuzaga kelgan taqdirda Tinch okeanidagi Amerika bazalariga zarba berish” vazifasi qo‘yildi.
5-sentabr, dushanba kuni Shimol mahalliy vaqt bo‘yicha 12:14 atrofida (Toshkent vaqti bo‘yicha 08:14 da) Xvanxe-Pukto provinsiyasidagi Xvanchju uyezdidan uchta ballistik raketa uchirgan edi. Shimoliy Koreya Yapon dengiziga qarata otgan ballistik raketalardan kamida bittasi Yaponiya havo hujumiga qarshi mudofaasining identifikatsiya hududiga kelib tushdi.
Izoh (0)