Xitoy bosh vaziri O‘zbekistonning elchixonasiga tashrif buyurdi va ta’ziya izhor etdi

Xitoy bosh vaziri Li Ketsyan O‘zbekiston Birinchi Prezidenti Islom Karimovning vafoti munosabati bilan ta’ziya bildirish uchun 5-sentabr, dushanba kuni O‘zbekistonning Xitoydagi elchixonasiga tashrif buyurdi, deya xabar bermoqda “Jahon” axborot agentligi.

Li Ketsyan Prezident Islom Karimov vafoti munosabati bilan Xitoy hukumati nomidan gulchambar qo‘ydi, ta’ziya kitobiga hamdardlik so‘zlarini bitdi va bu yo‘qotishdan chuqur qayg‘udoshlik izhor etdi.

“Li Ketsyan qayd etganidek, Xitoy rahbari Si Szinpin O‘zbekiston rahbariyatiga maxsus hamdardlik telegrammasi yo‘lladi va unda Prezident Islom Karimov Xitoy xalqining qadrdon do‘sti bo‘lgani, hayotligida Xitoy—O‘zbekiston munosabatlari rivojlanishiga muhim hissa qo‘shgani ta'kidlanadi”, — deyiladi agentlik axborotida.

“Uning vafoti nafaqat O‘zbekiston xalqi uchun ulkan yo‘qotish, balki Xitoy xalqi uchun ham samimiy do‘stdan judo bo‘lishdir. Xitoy hukumati va xalqi uning vafoti munosabati bilan chuqur qayg‘uda. Xitoy tomoni o‘zbek tomoni bilan birgalikda Xitoy va O‘zbekistonning keng qamrovli strategik sheriklik munosabatlari izchil rivojlanishini bundan keyin ham qo‘llab-quvvatlash va ilgari surish niyatidadir”, — dedi Li Ketsyan.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.