Kolumbiya mezbonligidagi Jahon Chempionatida Qozog‘iston, Solomon orollari hamda Kosta-Rika bilan bir guruhdan joy olgan Argentina 2004-yilgi natijasini takrorlash uchun harakat qiladi. O‘shanda jamoa yarim finalga qadar yetib borgandi.
Argentina termasi haqida eng lo‘nda fikrni faqatgina 1 ta statistika bilan berish mumkin. Bu jamoa Jahon Chempionatlarining hammasida ishtirok etgan.
Kolumbiyaga yo‘l
Argentina terma jamoasi KONMEBOL qit’asining Jahon Chempionatiga yo‘llanma beruvchi musobaqasiga favorit sifatida tashrif buyurdi. Braziliya terma jamoasining bu borada yaqqol yetakchi ekanigina argentinaliklarni cho‘chitishi mumkin edi.
Guruh bosqichida mamlakat futzalchilari ishonchni to‘la oqladi. Birinchi o‘yinda Urugvay 4:2 hisobida taslim etildi. Uning ketidan Kolumbiya 3:0, Chili esa 2:0 hisoblarida mahf etildi. Boliviyaga qarshi birgina uchrashuvda argentinaliklar avvalgi 3 ta o‘yinda kiritilgan umumiy gollardan ko‘proq urishdi — 11:0.
Yarim finaldagi g‘alaba Argentinani nafaqat finalga, balki mundialga ham olib chiqishi kerak edi. To‘g‘ri, turnirning 3-o‘rni uchun ham yo‘llanma kafolatlangan, biroq nega endi temirni qizig‘ida bosmaslik kerak? Paragvayga qarshi o‘yinda 3:1 hisobida oldinda borayotgan La Albiceleste, qandaydir 15 soniya ichida 2 ta gol o‘tkazib yubordi va vaziyatni qiyinlashtirib tashladi. Penaltilar seriyasigina jamoa joniga oro kirdi — 3:2.
Finaldagi raqib — Braziliya. Pentakampionlarga qarshi besh bor zalga chiqib, 1 marta durang qayd etsangiz — do‘ppingizni osmonga otavering. Faqat finalda emas. 0:4 hisobida yengilgan Argentina kumush medal bilan qoladigan bo‘ldi.
Jamoa haqida
Jahon Chempionatlarining bir emas, uchtasida to‘p tepgan Diyego Gistochchi murabbiy sifatida hujumkor Argentinaga asos soldi. Qit’a chempionatida uning shogirdlari 23 ta gol urib, turnir davomida 31 bor muvaffaqiyat qozongan Braziliyadan keyin sermahsullik borasida ikkinchi bo‘ldi.
Argentina termasi o‘yinini tashkil qiluvchi to‘rt futzalchini keltirib o‘tamiz: Almiro Vaporaki, Leandro Kuzzolino, Maksimiliano Ressia, Kristian Borruto. Har to‘rt futzalchi Yevropa qit’asida to‘p suradi. 2012-yil Tailandda bo‘lib o‘tgan Jahon Chempionatida mana shu yigitlar jamoaning asosiy figurasi bo‘la olgandi.
Saralash o‘yinlarida porlagan darvozabon Nikolya Sarmyentoga bor murabbiy kattagina umidlar bog‘lagan. O‘tkazilgan 6 ta o‘yinning teng yarmini quruq seriya bilan yakunlay olgan posbonga ishonmay bo‘ladimi?
Mundiallardagi ishtiroki
Argentina terma jamoasi 1989-yildan buyon o‘tkazib kelinadigan Jahon Chempionatlarining birortasini qo‘yib yubormagan uch mamlakatdan biri hisoblanadi. Jahonning 5 karra chempioni Braziliya va ikki karra g‘olibi Ispaniya qatorida turish Argentina uchun katta sharaf.
Argentina terma jamoasining mundiallardagi eng yaxshi natijasi 2004-yilgi mundialga to‘g‘ri keladi. Xitoy Taypeyi mezbonlik qilgan turnirda argentinaliklar yarim finalga qadar yetib borishdi va bronza medallar uchun kurashda Braziliyadan yengilishdi.
1996-yil Ispaniyada bo‘lib o‘tgan mundial Argentina uchun eng yomoni. Faqatgina shu yerda ular guruh bosqichini muvaffaqiyatsiz yakunlashga majbur bo‘lishdi. So‘nggi — Tailand—2012 mundialida ular chorak finalga yo‘l olib, yakunda musobaqani 7-o‘rin bilan nihoyalashdi.
Izoh (0)