Futbol bo‘yicha AQSh chempionati – MLS’ning 28-turidan o‘rin olgan “Nyu-York Siti” va “Di Si Yunayted” klublari o‘rtasidagi uchrashuv oldidan “shaharliklar” rahbariyati angliyalik yarim himoyachi Frenk Lempardni faoliyati davomida kiritgan 300-goli bilan tabriklashga qaror qildi, deb xabar bermoqda “Korrespondent.net”.
Uchrashuv oldidan 38 yoshli futbolchiga yelkasiga 300 soni yozilgan xotira futbolkasi va maxsus uzuk sovg‘a qilindi. Ammo Sky Sports “Nyu-York Siti” rahbariyati hisob-kitobda xatoga yo‘l qo‘yganini ma’lum qildi. Aslida mazkur uchrashuv oldidan Lempard hisobida 299 gol bilan maydonga tushgan.
Ma’lum bo‘lishicha, 1999-yili Lempard “Vest Hem” safida to‘p surayotgan vaqtda “Aston Villa”ga qarshi Angliya Kubogi o‘yinida ishtirok etgandi. O‘sha o‘yinda yarim himoyachi gol urgandi, ammo keyinroq uchrashuv natijasi bekor qilinib, “Vest Hem”ga texnik mag‘lubiyat yozilgan. “Nyu-York Siti” rahbariyati yo‘q golni hisobga olgan.
Shunga qaramay, Frenk Lempard faoliyatidagi 300-golini kiritishga muvaffaq bo‘ldi. “Di Si Yunayted”ga qarshi o‘yinning 85-daqiqasida angliyalik xavbek gol urib, jamoasini oldinga olib chiqdi va faoliyatidagi 300-goliga mualliflik qildi. 6 daqiqa o‘tar-o‘tmas raqiblar hisobni yana tenglashtirdi.
O‘yinning 93-daqiqasida Lempard yana katta sahnaga chiqib, o‘yindagi ikkinchi, faoliyatidagi 301-golini kiritdi.
Izoh (0)