Rossiyaliklar prezident sovg‘asi – BMW X6 ni sotuvga qo‘ygan sportchining qaroriga o‘z munosabatini bildirdi

26-avgust, juma kuni Rossiya prezidenti Vladimir Putin tomonidan Rio–2016 Olimpiadasi g‘oliblariga sovg‘a qilingan BMW X6 mashinasi avtomobillarni sotish saytida sotuvga qo‘yilgani haqida xabar qilingandi.

“Auto.ru” saytida Katerina ismi bilan BMW X6 sotilishini e’lon qilgan foydalanuvchi prezident sovg‘asi uchun 4 million 670 ming rubl so‘ragan. Mashina sotuvga qo‘yilgan kunning o‘zida sotib yuborilgan. “R-Sport” bosh muharriri Vasiliy Konov Katerina mashinaning egasi hisoblanmasligini hamda BMW X6 sinxron suzish bo‘yicha Olimpiada chempionlaridan biriga tegishli ekanini, ammo sportchi qizning ismini oshkor etmasligini aytgandi.

“Vesti.ru” ushbu voqea yuzasidan boshqa sportchi va mutaxassislarning fikrlarini jamladi.

– U kim ekanini aytmayman! Men o‘zim sotmayman, menga [mashina] yoqyapti, – dedi sinxron suzish bo‘yicha Rossiya termasining a’zosi Alla Shishkina.

– U kim ekanini bila olmaysiz ham. Agar inson bir nimani aytmoqchi bo‘lganida, bu haqda aytgan bo‘lardi. Nima uchun buning ortida katta mashmasha paydo bo‘lganini bilmayman. Bu sovg‘a va u bilan istalgan ishni qilsa bo‘ladi. Balki, o‘sha inson o‘zi uchun oddiyroq mashina sotib olmoqchi, yoki moliyaviy muammolarni hal qilmoqchidir, – dedi sinxron suzish bo‘yicha Rossiya termasining boshqa bir a’zosi Aleksandra Patskevich.

– Gap shundaki, bu qiz yaqindagina haydovchilik guvohnomasini oldi va kamdan-kam mashina haydaydi. U (mashinani sotib yuborgan qiz) avtomobil ichiga o‘tirganida, uning ichki va tashqi ko‘rinishi ma’qul keldi. Ammo u bunday katta hajmdagi mashinalarga ko‘nikmagan va Kremldan avtomobilni o‘zi haydab chiqa olmagan. Mashinani haydovchilardan biri uning uyiga keltirdi. Natijada u avtomobilni sotishga qaror qildi, men esa unga bunda yordam beryapman, – deya aniqlik kiritdi shaxsi ma’lum qilinmagan diler.

– Sovg‘a sifatida qabul qilib olingan avtomobilga jismoniy shaxslar daromadidan 13 foizlik soliq to‘lanadi. Bu ham katta summadir, – dedi huquqshunos Konstantin Malkov.

“Har bir sportchi o‘z yutug‘ini qanday qilib ishlatishni o‘zi hal qiladi. Masalan, qizlar o‘rtasidagi gandbol bahslarida Olimpiada chempioni bo‘lganlarning har biri Rio–2016 Paralimpiya o‘yinlaridan chetlashtirilgan sportchilarni qo‘llab-quvvatlash uchun 100 ming rubldan ajratadi. Bu esa 1,5 million rublni tashkil qiladi”, – deyiladi “Vesti.ru” xabarida.