Moskva xalqaro avtosaloni 25-avgust, payshanba kuni barcha istovchilar uchun o‘z eshiklarini ochdi. Ko‘rgazmaga kelganlar Hyundai, Mercedes-Benz kabi gigantlar qatorida Xitoy, O‘zbekiston va Eronda ishlab chiqilgan yangi avtomobillar bilan tanishishi mumkin, deya xabar beradi “RIA Novosti”.
Ravon Rossiyada 2015-yil oktabrida paydo bo‘ldi, oldin o‘zbek avtomobillari UzDaewoo brendi bilan sotilardi. Avtosalonda Ravon yangi R4 sedanini namoyish etdi. U avval Rossiyada sotilgan Chevrolet Cobalt modeli bilan deyarli bir xil. Shuningdek, Ravon pavilyonida Matiz, R2 (Chevrolet Spark), R3 Nexia va Gentra (yangilangan Chevrolet Lacetti) modellarini ko‘rish mukin. Kelgusi yil oxirigacha Rossiya bozoriga C-turkumidagi sedan va ixcham krossoverni kiritish ham rejalashtirilgan.
Ravon Motor Rus rivojlanish bo‘yicha direktori Sergey Vetrovga ko‘ra, kompaniya 2017-yilda kamida 10 ming yangi avtomobilni sotishni mo‘ljallamoqda.
“To‘g‘ri, bozor o‘zgardi, biroq ilgari UzDaewoo uning 3 foizigacha egalik qilardi. Biz kelgusida kamida 1 foizni qo‘lga kiritishni istaymiz. Birinchi R3 avtomobili dilerlarda sentabrda paydo bo‘ladi. Mashinalarning barchasi turgan joyida sotilib ketdi. Dabdurustdan avtomobilni xarid qilish mushkul bo‘lishi ehtimoldan xoli emas. Ularning O‘zbekistondan Voronejdagi logistika markazigacha yetkazib kelinishi muddati 2—3 haftani tashkil etadi”, — deya ta’kidladi Vetrov.
Izoh (0)