O‘z tarixida ilk bor Jahon Chempionatida ishtirok etadigan O‘zbekiston futzal terma jamoasi ertaga — 26-avgust kuni tonggi 8:00 da safarga jo‘nab ketadi.
Kolumbiyada bo‘lib o‘tadigan Jahon Chempionati oldidan O‘zbekiston 4 ta terma jamoaga qarshi o‘rtoqlik o‘yinlarida maydonga tushadi: Eron, Portugaliya, Ispaniya va Italiya.
Toshkentdan uchib ketadigan futzalchilarning birinchi manzili Eron bo‘ladi. Xose Mariya Mendes shogirdlari amaldagi Osiyo chempioniga qarshi ikki o‘rtoqlik o‘yinida ishtirok etadi. Bellashuvlar 28—29-avgust kunlarida o‘tkaziladi.
Erondan keyingi manzil Portugaliya bo‘lib, bu yerda o‘zbekistonlik futzalchilarni yana 2 ta bahs kutib turibdi. Ularning birinchisi 1-sentabr kuni mezbon Portugaliya termasiga qarshi bo‘lib o‘tsa, ertasiga — 2-sentabr kuni Yevropaning amaldagi chempioni Ispaniyaga qarshi o‘yin tashkil etiladi.
Portugaliyadan keyingi manzil Ispaniya bo‘lib, O‘zbekiston termasi bosh murabbiyining vatanida 3 kunlik yig‘in o‘tkaziladi va shu yerdan Kolumbiyaga jo‘nab ketiladi.
Italiya terma jamoasiga qarshi o‘rtoqlik o‘yini Jahon Chempionati o‘tadigan Kolumbiyada 7-sentabr kuni o‘tishi kelishib olingan. Mundialning o‘zi 10-sentabr kuni O‘zbekiston va Panama o‘yini bilan start oladi.
Osiyo vitse-chempioni sifatida Jahon Chempionatiga qadam qo‘ygan O‘zbekiston Toshkent mezbonlik qilgan qit’a musobaqasidan keyin 5 ta termaga qarshi 9 ta o‘rtoqlik o‘yinida ishtirok etdi. Raqiblardan 3 tasi JCh—2016 da ishtirok etadigan Vetnam, Qozog‘iston va Ozarbayjon termalari bo‘ldi.
Ma’lumot uchun, 26-avgust kuni Toshkentdan jo‘nab ketadigan O‘zbekiston futzal terma jamoasining bosh murabbiyi Xose Mariya Mendes bilan 25-avgust kuni matbuot anjumani bo‘lib o‘tadi. O‘FF anjumanlari zali mezbonlik qiladigan uchrashuvda barcha jurnalistlar 16:00 dan boshlab ishtirok etishi mumkin.
O‘zbekiston terma jamoasining Osiyo Chempionatidan keyin o‘tkazgan o‘rtoqlik o‘yinlari:
23-aprel, 2016Vyetnam — O‘zbekiston 2:224-aprel, 2016Yaponiya — O‘zbekiston 3:312-iyul, 2016O‘zbekiston — Tojikiston 3:313-iyul, 2016O‘zbekiston — Tojikiston 2:114-iyul, 2016O‘zbekiston — Tojikiston 5:59-avgust, 2016Qozog‘iston — O‘zbekiston 6:110-avgust, 2016Qozog‘iston — O‘zbekiston 4:216-avgust, 2016O‘zbekiston — Ozarbayjon 3:317-avgust, 2016O‘zbekiston — Ozarbayjon 2:6
Izoh (0)