Qashqadaryo viloyatida bunyod etilayotgan Tollimarjon bug‘-gaz elektr stansiyasi uchun mo‘ljallangan ulkan gaz turbinalari O‘zbekistonga yetib keldi. Bu haqda Facebook’dagi “Voditeli Tashkenta” guruhida videoxabar qoldirilgan.
“Qarshi, kutib ol, sening oldingga ketishyapti”, — deb izoh qoldirgan videoxabar muallifining ma’lum qilishicha, u gaz turbinalarini olib kelayotgan avtojamlanmani Ustyurtda uchratgan.
Uskunalar Germaniyaning Instar Projects kompaniyasi tomonidan yetkazib berilmoqda. Kompaniya saytida yozilishicha, u Tollimarjon stansiyasi uchun Janubiy Koreya, Vyetnam va Xitoydan olib kelinadigan uskunalarni yetkazib beradi.
Kompaniya bungacha nafaqat Tollimarjondagi, balki Toshkentdagi issiqlik elektr stansiyasi uchun ham zarur uskunalarni yetkazib berish xizmatini ko‘rsatgan.
Osiyo Taraqqiyot bankining Markaziy va G‘arbiy Osiyo bo‘yicha bosh direktori Shon O’Sallivanning ma’lum qilishicha, Tollimarjon bug‘-gaz elektr stansiyasiga umumiy quvvati 900 megavatt bo‘lgan gaz turbinalarini o‘rnatish loyihasining qiymati 1,2 milliard dollarga teng.
“Mazkur megaloyiha uchun uchun zarur uskunalar butun dunyodan — ba’zi ehtiyot qismlar Yaponiyadan, ba’zilari AQShdan, shuningdek, Yevropa mamlakatlari, Hindiston, Xitoy va Janubiy Koreyadan yetkazib berilmoqda”, — deydi O’Sallivan.
O’Sallivanning 30-iyundagi videomurojaatida 400 tonnalik gaz turbinalari jahon okeanlari va Kaspiy dengizini kesib o‘tib, Qozog‘iston bo‘ylab O‘zbekiston tomon harakatlanayotganini ma’lum qilgan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)