Belgiya milliy lotereyasi tashkilotchilari 6 million yevro yutib olgan g‘olibni topolmadi

26-mart kuni 6,176 million yevro yutib olgan Bryussel fuqarosi belgilangan oxirgi mudat — 13-avgust, shanba kuni yarim tungacha yutuqni olish uchun kelmadi. Bu haqda Belgiya milliy lotereyasi matbuot xizmati ma’lum qildi, deya xabar beradi TJournal. 

Tashkilotchilar g‘olibni topish uchun Fransiya, Niderlandiya va Germaniya OAVlari, mamlakatdagi 3400 dan ortiq chakana savdo nuqtlarida e’lonlar joylashtirdi. Yutuqqa ega bo‘lish istagidagi kishilardan mingdan ziyod qo‘ng‘iroq bo‘ldi, yuzlab maktublar olindi, biroq ular orasida haqiqiy g‘olib topilmadi. Soxta “g‘oliblar” ular aynan qayerda yutuqli chiptani xarid qilganliklari to‘g‘risidagi savol chig‘irig‘idan o‘tolmadi. 

Egasi chiqmagan 6,176 million yevro lotereya yutuqli fondiga qaytarildi. Bu Belgiya milliy lotereyasi tashkilotchilari g‘olibni topolmaganligi bilan bog‘liq ikkinchi holat ekanligi aytilmoqda.