Ruminiyada qirolicha Annaning dafn marosimi bo‘lib o‘tdi

Ruminiyada sobiq qirol Mixayning rafiqasi dafn qilindi, deb yozadi “TASS”. Shu munosabat bilan mamlakatda milliy motam e’lon qilindi, davlat bayroqlari tushirildi.

Dafn marosimi Buxarestdagi Qirollik saroyidagi pravoslav ibodati bilan boshlandi. So‘ng tobut saroy qarshisidagi maydonga chiqarildi, u yerda katolik rasm-rusumlariga muvofiq diniy marosim o‘tkazildi.

Shundan keyin motam korteji mamlakat qirollari maqbarasi joylashgan Kurtya-de-Arjesh shahriga yo‘l oldi, u yerdagi cherkovda yopiq dafn marosimi o‘tkazildi.

Motam marosimida uning to‘ng‘ich qizi, merosxo‘r malika Margareta va shahzoda Radu, bosh vazir Dachian Cholosh, Ruminiya pravoslav cherkovi patriarxi Daniyel, xorijiy sulolalar a’zolari, Ruminiya va Moldova davlat muassasalari vakillari, shuningdek, mingga yaqin shaharliklar qatnashdi.

Eslatib o‘tamiz, Ruminiya qirolichasi, qirol Mixayning rafiqasi, malika Anna Burbon-Parmskaya 1-avgust kuni Shveysariyada 92 yoshida vafot etdi.