Rio—2016 futbol musobaqasining yarim finaliga to‘rt qit’aning to‘rt jamoasi yetib keldi

Rio—2016 Olimpiadasining futbol turnirida yarim finalga yo‘l olgan to‘rt terma jamoa nomi aniq bo‘ldi: Braziliya, Gonduras, Nigeriya va Germaniya.

Guruh bosqichini muvaffaqiyatli yakunlagan Osiyo qit’asining yagona vakili Janubiy Koreya chorak finalda Gondurasdan yengildi — 0:1. Uchrashuvning 60-daqiqasiga kelib koreyaliklar o‘z darvozasidan gol o‘tkazib yubordi.

O‘z maydonlaridagi Olimpiadani ketma-ket ikki golsiz durang bilan boshlagan Braziliya terma jamoasi guruhdagi so‘nggi o‘yinda Daniyani 4:0 hisobida mag‘lub etgandi. Bu safar esa Kolumbiyaga imkoniyat qoldirmadi — 2:0. Neymar hisobni ochib bergan uchrashuvdagi ikkinchi gol Luan nomiga yozildi.

Nigeriya termasi Daniya darvozasiga ikkita gol urdi. Jon Obi Mikel nigeriyaliklarning birinchi goliga mualliflik qildi. Ikkinchi aniq zarba esa Umarga tegishli bo‘ldi.

Chorak finaldagi eng yirik natija Yevropaning ikki terma jamoasi o‘rtasidagi o‘yinda qayd etilib, nemislar Portugaliyaga imkoniyat qoldirmadi — 4:0.

Yarim finalda Braziliya terma jamoasi Gondurasni imtihon qiladi. Nigeriya va Germaniya terma jamoalari o‘rtasidagi o‘yin finalning ikkinchi ishtirokchisini aniqlab beradi. Bellashuvlar 17-avgust sanasida bo‘lib o‘tadi.

Ayni vaqtda germaniyalik Serj Gnabri 6 ta gol bilan Rio—2016 Olimpiadasining to‘purari bo‘lib turibdi. Boshqa bir nemis futbolchisi Nils Petersen hisobiga 5 ta aniq zarba mavjud.

Olimpiadaning futbol turnirida 23 yoshgacha bo‘lgan futbolchilar ishtirok etadi va har bir terma jamoaga maksimum uch nafar katta yoshli futbolchi xizmatidan foydalanishga izn beriladi.

Rio—2016. Futbol Chorak final bellashuvlari 13-avgust, shanba

Portugaliya — Germaniya 0:4

Nigeriya — Daniya 2:0

Janubiy Koreya — Gonduras 0:1

Braziliya — Kolumbiya 2:0

Yarim final bellashuvlari 17-avgust, chorshanbaBraziliya — GondurasGermaniya — Nigeriya