Politsiyachining afro-amerikalikka navbatdagi o‘q uzishi natijasida Viskonsin shtatiga qarashli Miluoki tumanida ommaviy tartibsizlik kelib chiqdi, deb xabar bergan “TASS”. Bu holat shanba kuni ro‘y bergani mahalliy Milwaukee Journal Sentinel nashrida qayd etilgan.
Nashrning guvohlik berishicha, tartibsizlikda yuzga yaqin odam ishtirok etgan va ularning aksar qismi o‘zini tajovuzkor tomondan ko‘rsatgan. Odamlar avvaliga yo‘l chetidagi avtomashinalardan birini yoqib yubordi, keyinroq esa qolgan mashinalarning oynasini sindirishga o‘tib ketdi. Olamonni tinchlantirish uchun politsiya va tezkor guruh ish boshladi. Politsiya keskin qaror qabul qilishga shoshilmasdan, patrul mashinalar yordamida vaziyatni nazorat qilishga uringan.
Avvalroq politsiya hodimi ish vaqtida qurollangan shubhali shaxsga qarata o‘q uzgandi. “Gap Miluoki shahrida yashovchi 23 yoshli yigit haqida bormoqda. Bunga qadar u bir qator tartibsizliklarda faol bo‘lgan. Masalan, u mart oyidagi tartibsizlik vaqtida to‘pponcha bilan qurollangandi. Voqea sodir bo‘lgan vaqtda uning yonidan to‘pponcha va 500 ta patron topildi”, — deb izoh bergan politsiya boshqarmasi.
Politsiyaning qayd etishicha, voqeada ishtirok etgan tartib posboni 24 yoshda bo‘lib, olti yildan beri xizmat vazifasini bajaradi. Shuning uch yilini u ofitser sifatida o‘tkazdi. Politsiyachi jarohatlanmagan va xizmat vazifasini bajarish tartib-qoidasiga ko‘ra, vaqtincha lavozimidan ozod etilgan. Uning hatti-harakati qonun doirasida bo‘lgani yoki yo‘qligi masalasini Miluoki prokuraturasi okrugi ko‘rib chiqadi.
AQShda so‘nggi vaqtlarda qora tanli fuqarolar va politsiya to‘qnashuvi holatlari tez-tez kuzatilayotgani tartib saqlovchi organlarga nisbatan e’tirozga sabab bo‘lmoqda. Bunda politsiya hodimlari tomonidan qayd etilgan ikkita qotillik asos sifatida ko‘rsatilgan.
7-iyul kuni Dallasdagi namoyish chog‘ida afro-amerikalik Mika Xavyer Jonsonning o‘q ochishi natijasida 5 nafar politsiyachi olamdan ko‘z yumgandi. Shuningdek, 7 nafar politsiya hodimi va ikki fuqaro jarohatlangan. 17-iyul kuni esa AQSh dengiz piyodalari safida xizmat qilgan qora tanli Gevin Long 3 nafar tartib posbonini otib tashlagan, yana shunchasi yaralagandi. Har ikki holatda ham tartib buzuvchilar politsiya tomonidan otib tashlangan.
Izoh (0)